المقالة دي بتناقش تحدي كبير بيواجهنا كلنا كقادة مؤسسيين او حتى شخصين لو كنا بنقود فرق صغيرة او مؤسسات كبيرة، كلنا بنعدي في تحدي ازاي اقرب من الناس اللي حوليا، اعضاء الفريق او الناس اللي انا مسؤول عنهم في حياتي بشكل يساعد على تماسك المجموعة وعلى تخطي المصاعب وتحقيق الاهداف

مشاركتي مشاعري مع المجموعة  بيبني علاقة انسانية تساعدنا على بذل مجهود اكبر وتخطي مصاعب كبيرة ولكن في نفس الوقت الناس اللي حوليا محتاجين يحسوا بقدرتي على قيادة نفسي والتحكم في مشاعري علشان يحسوا بالامان تحت راية قيادتي

الحقيقة الاربع نصائح اللي في المقال علشان نكون منفتحين ونشارك مشاعرنا بشكل صحي وفعال انا    اتعاملت معهم في مواقف مختلفة في حياتي ومع عملائي من القادة

١- اعرف مشاعرك وافهمها قبل ما تظهرها 

لمًا باحس بمشاعر قوية مأثرة عليا في حاجة لها علاقة بالشغل او حتة مع زوجتي وبناتي بيفيد جداً اني ابدأ افهم المشاعر دي، واهم خطوة في الموضوع ده اني اسمي الشعور ده زي غضب او حزن او احباط او اي اسم يعبر فعلياً عن اللي باشعر به، وده بيكون من خلال اني اتوقف ٣٠ ثانية واسأل نفسي "اسمه ايه الشعور اللي عندي دلوقتي؟" ومهم انه يكون اسم شعور مش تحليل لموقف يعني مثلاً "انا حاسس ان الشخص ده مش بيحترمني" ده مش اسم شعور ده تحليل للموقف ولكن "انا حاسس بالاهانة" او "انا حاسس بالغضب" ده اسم شعور

بعد كدة اسأل نفسي "ايه سبب الشعور ده؟" ومهم اني الاجابة تكون بالمشاهدات المرئية مش النوايا

وبعدين اسأل نفسي "ايه الاحتياج اللي عندي ورا الشعور ده؟" يعني انا محتاج ايه؟ والشعور ده بيحاول يوصل لي رسالة بالاحتياج ده، زي انا مثلاً "انا محتاج اخلص المشروع في الموعد المحدد له"

٢- نظم مشاعرك  

 كتير من القادة اللي باشتغل معهم بيشتكوا ان فيه اشياء بتستفزهم زي اخطاء الاخرين او عوامل خارجية مش متوقعة ولما بيحاولوا يتواصلوا مع اللي حولهم علشان يتعاملوا مع التحدي، اللي حولهم بيغلطوا اكتر او بيخافوا منهم او بيتحاشوهم وهنا باشتغل مع القائد على مهارة ادارة المشاعر وتوجيهها في قنوات تساعد على تحقيق الهدف مش مجرد تفريغ لشحنة شعورية، مهارة ادارة المشاعر لا تقل اهمية عن مهارة ادارة المجموعة حتى في البيت مع الاسرة ده اللي بيساعدنا على تحقيق الاهداف اللي عايزين نوصل لها

٣- تعامل مع مشاعرك من غير ما تتسرب للي حوليك 

الاحساس الاول اللي بيجيلي اما بيكون عندي مشاعر قوية ان عايز اخرجها بشكل تلقائي، الاحساس التاني اني ببقى عايز اكتمها علشان ما تأثرش على اللي حوليا والحقيقة عملائي من القادة اغلبهم بيكون عندهم التسلسل ده ولكن الاختيارين لهم نتايج سلبية لان بدل ما المشاعر دي كانت تحدي عندي لوحدي اصبحت تحدي عند كل اللي حوليا حتى في حالة كتمها هتلاقي لنفسها مخرج من غير ما احس وهتوصل للي حواليا بشكل سلبي يأثر عليهم، الحل اللي باحاول اتبعه واشتغل مع عملائي عليه هو اني اعبر بشكل هاديء وعقلاني عن اني بامر بالشعور ده واسبابه والاحتياج اللي عندي وده بيمثل قناة صحية للتفريغ بدون ردود افعال وتأثيرات سلبية

٤- اعرض خطة لتخطي التحدي 

من اهم الحاجات اللي مطلوبة من القائد هو انه يساعد الناس انها تشوف الطريق اللي مفروض يمشوا فيه علشان المجموعة تحقق اهدافها، حتى لو الطريق مش واضح لي بافكر نفسي ان مسؤوليتي هي ايجاد الطريق وببدأ في ادارة نقاش يساعد الفريق للوصول  للاختيارات المتاحة وتحديد افضلهم للمجموعة حتى لو اقتصر ده على الخطوة التالية فقط ولما ناخد الخطوة دي بعدها ممكن نحدد الخطوات اللي بعدها

لاحظت في تجربتي الشخصية وفي الشغل مع عملائي من القادة  ان التعامل مع مشاعرنا بالشكل ده  بيقربنا من الفريق بشكل صحي وفعال وبيساعدنا نعبر عن مشاعرنا ونفتح قلوبنا لهم من غير مايكون ده له اثر سلبي على مشاعرهم وبالتالي ادائهم واداء المجموعة

Social media platforms